បន្ទាយមានជ័យ៖ សមត្ថកិច្ចព្រំដែននៅក្នុងខេត្តបន្ទាយមានជ័យបានឃាត់ខ្លួនពលរដ្ឋខ្មែរចំនួន២៣នាក់ ក្នុងនោះមានកុមារ៤នាក់ ដែលបំរុងលួចឆ្លងដែនទៅរកការងារធ្វើនៅប្រទេសថៃដោយខុសច្បាប់តាមរថយន្ដ១គ្រឿង កាលពីយប់ថ្ងៃទី២២ ខែធ្នូ ឆ្នាំ២០២១។
មេបញ្ជាការវរសេនាតូចនគរបាលការពារព្រំដែនគោកលេខ៨១៥ លោកវរសេនីយ៍ឯក សួង សៅ បានប្រាប់អ្នកយកព័ត៍មានថាពលករឆ្លងដែនខុសច្បាប់ទៅរកការងារធ្វើនៅប្រទេសថៃមានចំនួន២២នាក់ដែលមកពីខេត្តសៀមរាប ត្រូវចាញ់បោកមេខ្យល់ ពីការជួញដូរមនុស្ស និងការធ្វើអាជីវកម្មផ្លូវភេទ និងច្បាប់ស្តីពីការងារក្នុងការបញ្ចុះបញ្ចូលលួងលោម ឬបោកឲ្យអ្នកដទៃនាំទៅរកការងារធ្វើដោយមិនស្របច្បាប់ក្នុងគោលដៅស្វែងរកផលប្រយោជន៍ផ្ទាល់ខ្លួន។
បើតាមលោក សួង សៅ បន្ទាប់ពីធ្វើការអប់រំណែនាំដល់ពលករទាំង២២នាក់ និងម្ចាស់រថយន្តហើយ កម្លាំងបានប្រគល់បន្តទៅផ្នែកជំនាញរបស់អធិការដ្ឋាននគរបាលស្រុកម៉ាឡៃ អនុវត្តបន្តតាមនិតិវិធី៕